सूर्य एन श्रेष्ठ निर्देशित फिल्म ‘लाइफ इन एलए’ को ट्रेलर सार्वजनिक भएको छ। बुधबार राजधानीमा आयोजित एक कार्यक्रमबीच फिल्मको ट्रेलर सार्वजनिक गरिएको हो।
सार्वजनिक ट्रेलरमा विदेशमा बस्ने नेपालीको त्रिकोणात्मक प्रेम कथालाई प्रस्तुत गरिएको छ। ब्यास बिस्सु, अकेशा विष्ट र शिल्पा मास्केको प्रेममा आउने उतार–चढाबलाई फिल्ममा देखाइएको छ।
‘अमेरिकाको विभिन्न सहरमा प्रदर्शन भैसकेको फिल्मलाई दर्शकले निकै रुचाए। नेपाली दर्शकबाट पनि राम्रो साथ पाउने विश्वास छ’ निर्देशक श्रेष्ठले कार्यक्रममा बोल्दै भने।
फिल्ममा ब्यास, अकेशा र शिल्पासँगै गौरव पहारी, बुद्धि तामाङ, प्रकाश घिमिरे, लोकेन्द्र लेखकको अभिनय छ। फिल्ममा अमेरिकामा बसोबास गर्ने जारेड बिलप्स, साम भुजेल, जयन्द्र चिलुवाल लगायतको पनि अभिनय छ।
ब्यास इन्टरटेनमेन्टको प्रस्तुति रहेको फिल्मलाई ब्यास बिस्सुले निर्माण गरेका हुन्। संसार सुवेदी कार्यकारी निर्माता रहेको फिल्ममा अमेरिकाको लागि राजेन्द्र ठकुराथी निर्माताको रुपमा छन्।
यो फिल्म आगामी जेठ ६ गतेबाट प्रदर्शन हुँदैछ।
