अभिनेता आकाश श्रेष्ठ र अभिनेत्री पूजा शर्मा अभिनित फिल्म 'सम्झना बिर्सना'को प्रदर्शन मिति सरेको छ। जेठ ३ गते प्रदर्शन हुने भनिएको फिल्म स्थानीय तहको निर्वाचनका कारण सारिएको हो।
निर्माण पक्षले नयाँ प्रदर्शन मिति केही दिनपछि सार्वजनिक गर्ने जानकारी दिएका छन्। मंगलबार फिल्मको शीर्ष गीत सार्वजनिक गर्ने तयारी गरिएको थियो। तर, वितरक र निर्माताबीच तत्काललाई फिल्मको प्रदर्शन मिति स्थगित गर्ने सहमति भएको छ।
निमेश प्रधानको निर्देशन रहेको फिल्ममा आकाश र पूजासँगै छुल्ठिम गुरुङ, सुनिल थापा, शिशिर रानालगायतका कलाकारको अभिनय रहेको छ। फिल्मको कथा तथा पटकथा निर्देशक प्रधानले नै तयार पारेका हुन्।
दार्जिलिङ, सिक्किम र नेपालको जीवनको प्रेमकथामा आधारित भएर निर्माण भएको फिल्ममा अदुत्य प्रधान र रेबेका प्रधानको लगानी छ।
शिव ढकालले छायांकन गरेको फिल्मलाई तारा थापाले सम्पादन गरेका छन्।
अभिनेता आकाश र पूजा शर्माले ‘रामकहानी’ र ‘पोइ पर्यो काले’मा एकसाथ काम गरेका थिए। उनीहरु दुवैले अभिनय गरेको फिल्म ‘सम्हालिन्छ कहिले मन’ प्रदर्शनको पखाईमा छ।
