शुक्रबार भइरहेको स्थानीय तहको निर्वाचनमा कलाकारहरूले आ-आफ्नो मतदान केन्द्रबाट मतदान गरेका छन्।
कलाकारहरूले आफ्नो मतदान अधिकार प्रयोग गर्नू भन्दै सल्लाह सुझाव समेत दिएका छन्।
अभिनेत्री करिश्मा मानन्धरले आफूले भोट हालेको जानकारी दिँदै फेसबुकमा केही तस्बिर सार्वजनिक गरेकी छन्। उनले शीतल निवास अगाडि रहेको केन्द्रमा पुगेर मतदान गरेकी हुन्। उनी पति विनोद र छोरी कवितासँग भोट हाल्न पुगेकी थिइन्।
हाँस्य कलाकार हरिवंश आचार्यले बुढानीलकण्ठबाट मतदान गरेका छन्। उनले आफूले मतदान गरेको तस्बिर फेसबुकबाट सेयर गर्दै लेखेका छन्, ‘मैले त मतदान गरेँ, तपाईंले गर्नुभयो?’
त्यस्तै हाँस्य कलाकार मदनकृष्णले पनि आफूले भोट हालेको जानकारी दिँदै फेसबुकमा तस्बिर सार्वजनिक गरेका छन्। ‘मैले नि भोट हालेर आएँ है’ उनले लेखेका छन्। उनले चारखाल डिल्लीबजारबाट भोट हालेका हुन्।
अभिनेत्री आँचल शर्मा र अभिनेत्री वर्षा राउतले इन्स्टाग्राम स्टोरीबाट आफूले मतदान गरेको जानकारी दिएका छन्। अभिनेत्री वर्षाले आमासँग कोटेश्वर महादेव मन्दिरमा पुगेर मतदान गरेकी हुन्।
