अभिनेता सरोज खनाल फिल्म ‘बगान’बाट निर्देशनमा डेब्यू गर्दैछन्।
आइतबार चाबहिलस्थित चलचित्र विकास बोर्डको हलमा फिल्मको निर्माण घोषणा गर्दै ‘इन्ट्रो टिजर’ र गीत ‘तिम्रो सुन्दर आँखा’ सार्वजनिक गरिएकाे थियाे।
सुगम पोखरेल र अस्मिता अधिकारीको स्वर रहेको ‘तिम्रो सुन्दर आँखा’ गीत सार्वजनिक गरिएको हो। रोमान्टिक गीतको भिडिओमा अभिनेता आकाश श्रेष्ठ र प्रमिला कार्की फिचर्ड छन्।
सुरेश वाग्लेको शब्द रहेको गीतमा सुभाष भुषालको संगीत, कविराज गहतराजको कोरियोग्राफी छ।
फिल्ममा सरोज खनाल, आकाश श्रेष्ठ, प्रमिला कार्कीसँगै नीर शाह, बसुन्धरा भुषाल, मिथिला शर्मा, करिश्मा मानन्धरको अभिनय छ। यसै फिल्मबाट प्रमिला कार्की डेब्यू गर्दैछिन्।
सरोज खनालले आफूले फिल्ममा अभिनय गर्दै सिकेको ज्ञान र अनुभवलाई निर्देशनमा प्रयोग गर्ने बताए।
‘मैले फिल्मको विषयमा पढेर आएको होइन, अभिनय गर्दागर्दै सिकेको हो। यसैलाई निर्देशनमा प्रयोग गर्ने प्रयास गर्छु,’ उनले भने।
नेपाली वेबसाइट डटकमको प्रस्तुती निर्माण भएको ‘बगान’का निर्माता सुरेश वाग्ले र कार्यकारी निर्माता अभिनेत्री करिश्मा मानन्धर छिन्। उत्सव दाहालले छायांकन गर्दे फिल्मलाई अर्जुन जिसी, राजेश शाह र सन्देश शाहले सम्पादन गर्नेछन्।
