‘छक्का पन्जा’ टिमको आगामी फिल्मलाई हेमराज विसीले निर्देशन गर्ने भएका छन्।
निर्देशक विसीले ‘छक्का पन्जा ४’ निर्देशन गर्ने चर्चा छ। तर अभिनेता तथा निर्माता दीपकराज गिरीले हेमराज विसीले निर्देशन गर्ने फिल्मको नाम तय नभएको बताए।
‘फिल्मको नाम तय भइसकेको छैन। युवा पुस्ताको कथा भएको हुँदा फिल्मको नाम परिवर्तन गर्ने सोचमा छौँ। फिल्मको लागि निर्देशकसँग सम्झौता भइसक्यो। तर कलाकार छनोट गरिएको छैन,’ उनले सेतोपाटीसँग भने।
उनले केही दिनपछि फिल्मको औपचारिक घोषणा गर्ने बताए। फिल्ममा दीपकराज गिरी, दीपाश्री निरौला, केदार घिमिरे, निर्मल शर्माको अभिनय रहने पक्का भैसकेको छ।
‘छक्का पन्जा’ सिरिजलाई दीपाश्री निरौलाले निर्देशन गर्दै आएकी छन्। आगामी दसैँमा ‘छक्का पन्जा ४’ प्रदर्शन हुने बताइएको थियो। तर छायांकनमा जानुभन्दा अगाडि फिल्मको नाम परिवर्तन गरिने भएको छ।
फिल्म ‘होस्टेल’बाट निर्देशन यात्रा सुरु गरेका हेमराजले ‘जेरी’, ‘गाजलु’, ‘ग्याङस्टार ब्लूज’, ‘द ब्रेकअप’, ‘घामड शेरे’ फिल्मको निर्देशन गरिसकेका छन्।
