इन्ट्रा नेशनल वेलफेयर एण्ड सपोर्ट फाउन्डेशन अफ अमेरिका (इन्ट्रा फाउन्डेशन)ले अमेरिकामा आयोजना गरेको ‘मेरो भ्वाइस कप युएसए र मेरो डान्स कप युएसए-२)को उत्कृष्ट १२ मा पर्न सफल प्रतिस्पर्धीहरू काडमाडौंमा आएका छन्।
इन्ट्रा फाउन्डेशन, नेपाल च्याप्टरको आयोजनामा अमेरिकाबाट आएका २४ जना प्रतिस्पर्धीसहित ४२ जनालाई मंगलबार त्रिभुवन विमानस्थलमा स्वागत गरिएको हो। स्वागतपश्चात त्रिभुवन विमानस्थलबाट दुई दर्जन बढी मोटरसाइकल र्यालीसहित २४ प्रतिस्पर्धीलाई आयोजकले ठमेलको मुलबरी होटलमा पुर्याइएको थियो।
होटलमा आयोजित पत्रकार सम्मेलनमा दुई वटा रियालिटी शोको विषयमा जानकारी दिइयो। 'ग्यालेक्सी फोर के टेलिभिजन'बाट हरेक शुक्रबार र शनिबार प्रशारण भइरहेको यो शोको बाँकी १० भागको छायांकन नेपालमै हुनेछ। कार्यक्रमको फाइनल भने अमेरिकामा नै हुने आयोजकले जानकारी दिए।
अमेरिका र क्यानडामा रहेका नेपाली भाषीहरुले भाग लिएको प्रतिस्पर्धा अन्तर्गत ‘मेरो भ्वाइस कप- २’को उत्कृष्ट १२ मा शित्तल शर्मा, मुना लकान्ड्री, बाबु खालिङ, करण तामाङ, प्रेम अङदेम्बे, मेघा पौडेल, अजित सुब्बा, सम्राट गुरुङ, सागर सुवेदी र लिला गजमेर, संगीता बोगटी छन्।
यस्तै, ‘मेरो डान्स कप’को उत्कृष्ट १२ मा सुमन लामिछाने, सिवानी ढकाल, विशाल उप्रेती, रेजिना सुब्बा, रेनुका राई, सव्य विष्ट, सुमिका तामाङ, आयुषा समाल लगायत छन्।
यी दुवै कार्यक्रमको निर्देशक एलिन श्रेष्ठ हुन्। संस्थाका अध्यक्ष डिल्ली अधिकारीको परिकल्पनामा तयार भएको दुवै रियालिटी शोले अमेरिका र क्यानडामा रहेका नेपाली भाषी प्रतिभाहरुलाई विश्वमाझ चिनाउन मद्दत गरेको कार्यक्रम संयोजक इन्द्र बानियाँले बताए।
‘मेरो भ्वाइस कप युएसए’को निर्णायकमा दिपक जंगम, सुरेश अधिकारी, शिव परियार, पुष्पन प्रधान, सुजाता वर्मा र अर्जुन रसाइली छन्। यस्तै, ‘मेरो डान्स कप, युएसए’को निर्णायकमा मिथिला शर्मा, दिलिप रायमाझी, केकी अधिकारी, शंकर वीसी, संचिता लुइटेल र नरमान राई छन्। दुवै कार्यक्रमको संचालन नायिका रीमा विश्वकर्मा र राजेश घतानीले गर्नेछन्।
कार्यक्रममा फाउन्डेशनका नेपाल च्याप्टर अध्यक्ष दिलिप रायमाझीले अमेरिकाबाट आएका प्रतिस्पर्धीहरुलाई स्वागत गरेका थिए। सबै प्रतिस्पर्धीहरुले नेपाल आउन पाउँदा अत्यन्तै उत्साहित भएको बताए।
