बलिउड अभिनेता शक्ति कपूरका छोरा तथा अभिनेत्री श्रद्धा कपूरका भाइ सिद्धान्त कपूर लागुऔषध मुद्दामा पक्राउ परेका छन्।
भारतीय सञ्चार माध्यम जीन्यूजका अनुसार मेडिकल जाँच गर्दा उनले लागुपदार्थ सेवन गरेको पुष्टि भएको छ। हाल उनलाई बेङ्गलुरूस्थित उलसूर पुलिस थानामा राखिएको छ।
बेङ्गलुरू प्रहरीले एमजी रोडस्थित पार्क होटलको पबमा चलिरहेको पार्टीमा छापा मारेको थियो। पार्टीमा सिद्धान्तसहित ६ जना पक्राउ परेका छन्।
यस विषयमा शक्ति कपूर बोलेका छन्। उनले भने, 'म एउटा कुरा भन्न सक्छु कि यो सम्भव छैन।'
'शूटआउट एट वडाला'बाट फिल्ममा डेब्यू गरेका सिद्धान्तले फिल्म क्षेत्रमा खासै सफलता पाउन सकेनन्। उनले 'भूल भुलैया, भाग भाग, चुप चुप के ढोल’ जस्ता फिल्ममा सह-निर्देशनको काम गरेका छन्।
सिद्धान्त र श्रद्धाले एकसाथ फिल्म 'हसीना पार्कर'मा काम गरेका थिए। तर यो फिल्म पनि बक्स अफिसमा फ्लप भएको थियो।
सिद्धान्त पछिल्लो समय फिल्म 'चेहरे'मा देखिएका थिए।
