फिल्म 'सम्हालिन्छ कहिले मन'को गीत 'जरुरी कुरा छ' बोलको गीत सार्वजनिक भएको छ।
शुक्रबार काठमाडौंमा एक कार्यक्रम गर्दै फिल्मको गीत सार्वजनिक गरिएको हो। अन्जु पन्त र सुरेश लामाको स्वर रहेको रोमान्टिक गीतमा पूजा शर्मा र सोनम थोप्देन फिचर्ड छन्।
सुरेश वाग्लेको शब्द रहेको गीतमा अर्जुन पोखरेलले संगीत भरेका छन्।
सुदर्शन थापाले निर्देशन गरेको फिल्ममा पूजा र सोनमसँगै आकाश श्रेष्ठको मुख्य भूमिका छ। कभर गायक सोनम थोप्देनले यही फिल्मबाट अभिनयमा डेब्यू गर्दैछन्। उनी बलिउडका चर्चित गीतमा कभर संस्करणमा रूचाइएका गायक हुन्।
एबी इन्टरनेसनलको ब्यानरमा निर्माण भएको फिल्मका निर्माता अमित बस्नेत, परी राना र अजितकुमार थापा छन्। फिल्मको कथा महेश दवाडीले तयार पारेका हुन्।
बेलायत र नेपालमा छायांकन गरिएको म्युजिकल लभस्टोरी फिल्मलाई दर्शकले रूचाउने निर्माण टिमको विश्वास छ। सौरभ लामाले छायांकन गरेको फिल्मलाई अर्जुन जिसीले सम्पादन गरेका छन्।
यो फिल्म भदौ १७ गतेदेखि प्रदर्शन हुँदैछ।
