सुवर्ण थापा निर्देशित फिल्म 'द सिक्रेट अफ राधा'को पोस्टर सार्वजनिक भएको छ। फिल्मको प्रदर्शन मिति नजिकिएसँगै फिल्मका सम्पूर्ण कलाकारलाई समावेश गरेर पोस्टर सार्वजनिक गरेको निर्देशक थापाले बताए।
सार्वजनिक दुई पोस्टरमा फिल्मका सम्पूर्ण कलाकारलाई स्थान दिइएको छ। एक पोस्टरमा सृष्टि श्रेष्ठ कसैको खोजीमा यात्रा गरिरहेकी देखाइएको छ भने अर्का पोस्टरमा फिल्मका कलाकारहरूलाई विभिन्न मुद्रामा प्रस्तुत गरिएको छ।
'द सिक्रेट अफ राधा'लाई अभिनेता सौगात मल्लसँग मिलेर निर्देशक थापाले निर्माण गरेका हुन्।
बेपत्ता श्रीमानको खोजीको कथामा आधारित फिल्ममा सृष्टिसँगै सौगात मल्ल, खगेन्द्र लामिछाने, मेनुका प्रधान, पशुपति राई, दिव्य देव पन्त, राजन खतिवडा, लोकेन्द्र लेखक, दयाहाङ राई, निश्चल बस्नेत, बुद्धि तामाङ लगायतका कलाकारको अभिनय रहेको छ। फिल्ममा रंगकर्मी सुनिल पोखरेल पनि अतिथि भूमिकामा देखिनेछन्। फिल्मको कथा निर्देशक थापाले नै तयार पारेका हुन्।
नरेन्द्र मैनालीले छायांकन गरेको फिल्मलाई निमेश श्रेष्ठले सम्पादन गरेका छन्। फिल्ममा कालीप्रसाद बाँस्कोटाको संगीत छ। यो फिल्म भदौ १० गतेबाट प्रदर्शन हुनेछ।
