असार २४ गतेबाट प्रदर्शनमा आउने तयारीमा रहेको फिल्म ‘दोख’को दोस्रो टिजर सार्वजनिक भएको छ।
अनुप बरालले निर्देशन गरेको फिल्मको बुधबार नयाँ टिजर युट्युबमार्फत सार्वजनिक गरिएको हो। टिजरमा अभिनेत्री दिया मास्के र मनिष निरौलालाई प्रस्तुत गरिएको छ।
माओवादी द्वन्द्व कालको परिवेशमा निर्माण गरिएको फिल्ममा दिया र मनिषसँगै लोकमणि सापकोटा, माओत्से गुरुङ, राज थापा काउछा, सुरज मल्ल, रोय दिभ, कमल देवकोटा, साजन थापा मगरलगायत कलाकारहरूको अभिनय छ। फिल्मको कथा राजन कठेतले तयार पारेका हुन्।
सविन ज्ञवाली र मनोज अधिकारी निर्माता रहेको फिल्ममा भीम न्यौपाने, ओम गुरुङ, रञ्जु वाग्ले थापा कार्यकारी निर्माताको रुपमा छन्। फिल्मको एसोसियट निर्माताको रुपमा सन्तोष पाठक, धर्म अधिकारी, प्रविन पाठक, सुमिता आचार्य, दिपक खनाल, युवराज भट्टराई रहेका छन्। शैलेन्द्र डि कार्कीले छायांकन गरेको फिल्मलाई निमेष श्रेष्ठले सम्पादन गरेका हुन्।
गत शुक्रबार मात्रै अमृत गुरुङको स्वर रहेको ‘वन चरी उड्यो’ बोलको गीत सार्वजनिक गरिएको थियो।
