आगामी भदौ ३ गतेदेखि प्रदर्शन हुने फिल्म ‘कृष्णलीला’ को ‘ए मेरो हजुर..’ बोलको गीत सार्वजनिक भएको छ।
शुक्रबार काठमाडौंमा एक कार्यक्रम गर्दै रोमान्टिक गीत सार्वजनिक गरिएको हो। अभिनेता पुष्प खड्का र नवअभिनेत्री श्रद्धा क्षेत्री फिचर्ड गीतमा उनीहरू निकै प्रेमील भावमा प्रस्तुत भएका छन्।
रवि ओड र सुनिता कार्कीको स्वरमा डा. डिआर उपाध्यायको शब्द र बाबुल गिरीको संगीत तथा एरेन्ज रहेको छ। यस गीतलाई माइकल चन्दले निर्देशन तथा कोरियोग्राफी गरेका हुन्।
दीपक ओली निर्देशित फिल्मको प्रस्तुतकर्ता रोहित कट्टेल हुन् भने कार्यकारी निर्माता रत्न श्रेष्ठ छन्। लभस्टोरी जनराको फिल्ममा पुष्प र श्रद्धासँगै बुद्धि तामाङ, रवीन्द्र झा, नवीन रेग्मी, हिउँवाला गौतम, भावना गुरुङ, आयुष गुरागाईं, आयुषा क्षेत्री, पिताम्बर आचार्य लगायत कलाकारको अभिनय छ। फिल्मको लेखन लक्ष्मण सुवेदीले तयार पारेका हुन्।
शिव ढकाल र बाबु श्रेष्ठले छायांकन गरेको फिल्मलाई अर्जुन जिसीले सम्पादन गरेका हुन्। प्रकाश कार्की र केबल तामाङ निर्माता रहेको फिल्मको सहनिर्मातामा पिताम्बर आचार्य र रोजन श्रेष्ठ छन्। यो फिल्मलाई आरआर फिल्मस्ले वितरण गर्दैछ।
