ज्ञानेन्द्र देउजा निर्देशित फिल्म ‘झिँगेदाउ’को टाइटल टिजर सार्वजनिक भएको छ।
सार्वजनिक टिजरमा झिँगा, सिक्का र अभिनेत्री केकी अधिकारीको स्वर सुन्न सकिन्छ। निर्देशक तथा निर्माता देउजाले झिँगेदाउको अर्थ बुझाउन फिल्मको टाइटल टिजर सार्वजनिक गरेको बताए।
फिल्ममा केकी अधिकारी, आँचल शर्मा, मुकुन भुषाल र कुशल विष्टको मुख्य भूमिका रहेको छ। फिल्ममा केकी र आँचल देउरानी जेठानीको भूमिकामा देखिएका छन्।
कपनगडी सिनेमा र फिल्म क्र्यू नेपालको ब्यानरमा निर्माण भएको फिल्म भिमनिधि तिवारीको कथा ‘झिँगेदाउ’मा आधारित रहेको छ। प्रदीप भारद्वाजको पटकथा तथा संवाद लेखेको फिल्ममा अर्जुन पोखरेलको संगीत, रामजी लामिछानेको कोरियोग्राफी रहको छ।
सुलभ प्रतिक देउजा र समीक्षा देउजा निर्माता रहेको फिल्मका सह-निर्माताको रुपमा सुशिल दाहाल र ईश्वर घिमिरे रहेका छन्। विष्णु घिमिरेले छायांकन गरेको फिल्मलाई मित्र डि गुरुङले सम्पादन गरेका हुन्।
यो फिल्म भदौ १७ गतेबाट प्रदर्शन हुनेछ।
