लक्ष्मण सुनार निर्देशित फिल्म ‘बुलाकी’को प्रदर्शन मिति तय गरिएको छ।
बुधबार फिल्मको पोस्टर सार्वजनिक गर्दै प्रदर्शन मिति घोषणा गरिएको हो। यो फिल्म कार्तिक १८ गतेबाट प्रदर्शन हुने भएको छ।
सार्वजनिक पोस्टरमा फिल्मका कलाकार सुरक्षा पन्त, नरेन खड्का र विराज विष्टलाई प्रस्तुत गरिएको छ। गाउँले पहिरनमा रहेकी सुरक्षाकाे हातमा डाेकाे छ भने नाकमा बुलाकी लगाएकी छन्।
अर्काकी श्रीमती भगाउने पुरुषबाट जारी उठाउने कथालाई समावेश गरेको फिल्ममा सुरक्षा, नरेन र विराजसँगै प्रकाश कँडेल, रमेश बुढाथोकी, सुशील पोखरेल, लक्ष्मी गिरी, कुलदीप अधिकारी, झलनाथ खत्री, सरस्वती खत्री, उपासना वाइबा, सोनु सेढाइ, धनबहादुर राई, लक्ष्मण देवकोटा, बसन्त परियार लगायतको अभिनय छ। अभिनेता विराज विष्ट यहीँ फिल्मबाट डेब्यू गर्दैछन्।
छत्रेश्वरी म्यानेज्मेन्ट प्रालिको ब्यानरबाट निर्माण गरिएको फिल्ममा टोपेन्द्र विष्टको लगानी छ। डोल्पा, जाजरकोट र रुकुमका विभिन्न स्थानमा छायांकन गरिएको फिल्मलाई शिव ढकालले खिचेका हुन्।
