सुरेन्द्र पौडेलले निर्देशन गरेको फिल्म ‘बाबरी’को ‘चुलबुल चुलबुल’ बोलको गीत सार्वजनिक भएको छ। रोमान्टिक गीतमा अदिती बुढाथोकी र धिरज मगर फिचर्ड छन्।
बिहीबार सार्वजनिक गरिएको गीतमा सुजन चापागाईं र सुनिता थेगिमकको स्वर सुन्न सकिन्छ। रविन्द्र लामिछानेको शब्द रहेको गीतमा गायक चापागाईंले नै संगीत भरेका छन्। यो गीतलाई विक्रम लामा र एञ्जिला खत्रीले कोरियोग्राफी गरेका हुन्।
केही समयअघि ‘बाबरी रंगले’ बोलको गीत सार्वजनिक भएको थियो। उक्त गीतलाई दर्शकले निकै रूचाइरहेका छन्।
त्रिकोणात्मक प्रेमकथामा आधारित फिल्ममा अदिती र धिरजसँगै धिरज नाडकरको पनि मुख्य भूमिका छ। फिल्ममा बादल भट्ट, कमणमणी नेपाल, उर्मिला बस्नेत, ध्रुव कोइराला, सुनिता श्रेष्ठ, नितेश गुरुङ, त्रिशला गुरुङ, दीलिप गुरुङलगायत कलाकारको अभिनय छ।
बाबरी प्रोडक्सनको ब्यानरमा निर्माण भएको फिल्मको निर्माता गणेश बुढाथोकी पुष्पालता बुढाथोकी हुन्। सुष्मा गुरुङ सह-निर्माता रहेको फिल्मको कथा निर्देशक पौडेलले नै लेखका हुन्।
फिल्मको पटकथा तथा संवाद रितसिंह बोहोरा, सिजद दाहाल, मनोज त्रिपाठी र किशोर नेपालले मिलेर लेखेका हुन्। फिल्मको काठमाडौं, झापा, मोरङ र उत्तरी सिक्किमका विभिन्न रमणीय स्थानमा छायांकन गरिएको छ। नरेन्द्र मैनालीको छायांकन रहेको फिल्मका मुख्य सहायक निर्देशक रितसिंह बोहरा हुन्।
यो फिल्म भदौ ३१ गतेदेखि प्रदर्शन हुँदैछ।
