दिपक ओलीले निर्देशन गरेको फिल्म ‘कृष्णलीला’ को ट्रेलर सार्वजनिक भएको छ।
बिहीबार सार्वजनिक गरिएको ट्रेलरमा अभिनेता पुष्प खड्का सुस्त मनस्थिति भएको युवाको भूमिकामा देखिएका छन्। फिल्ममा अभिनेता पुष्प र अभिनेत्री श्रद्धा क्षेत्रीको प्रेममा आउने उतारचढावलाई प्रस्तुत गरिएको छ।
लभस्टोरी जनराको फिल्ममा पुष्प र श्रद्धासँगै बुद्धि तामाङ, रवीन्द्र झा, नवीन रेग्मी, हिउँवाला गौतम, भावना गुरुङ, आयुष गुरागाईं, आयुषा क्षेत्री, पिताम्बर आचार्यलगायत कलाकारको अभिनय छ। अभिनेत्री श्रद्धाको यो डेब्यू फिल्म हो। फिल्मको लेखन लक्ष्मण सुवेदीले तयार पारेका हुन्।
शिव ढकाल र बाबु श्रेष्ठले छायांकन गरेको फिल्मलाई अर्जुन जिसीले सम्पादन गरेका हुन्। प्रकाश कार्की र केबल तामाङ निर्माता रहेको फिल्मको सहनिर्मातामा पिताम्बर आचार्य र रोजन श्रेष्ठ छन्। यो फिल्मलाई आरआर फिल्म्सले वितरण गर्दैछ।
यो फिल्म भदौ ३ गतेदेखि प्रदर्शन हुँदैछ।
