विकास गिरीको लेखन तथा निर्देशनमा बन्न लागेको फिल्म ‘बिजुली च्याप्टर १’ को निर्माण घोषणा गरिएको छ।
काठमाडौंमा एक कार्यक्रम गर्दै फिल्मको निर्माण घोषणा गरिएको हो। चार युग सत्य, त्रेता, द्वापर र कलि युगको प्रतिनिधि पात्रको कथामा बन्न लागेको फिल्मको अर्को भाग पनि निर्माण गरिने निर्देशक गिरीले बताए। याे विकास गिरीको डेब्यु निर्देशन फिल्म हो।
‘हिन्दु धर्मग्रन्थहरु रामायण, महाभारत र भागवत गीतका चरित्रलाई समेटेर फिल्म बनाउन लागिएको हो। यो हिन्दु धर्मग्रन्थका पात्रको मोडर्न एडप्टेसन हो,’ उनले भने।
बासुकी फिल्म्सको ब्यानरमा निर्माण हुने फिल्ममा अभिनेता मुकुन भुसाल, बेनिशा हमाल र कालु राना अनुबन्धित भएका छन् भने बाँकी कलाकार छनोट हुन बाँकी छ।
अभिनेता भुसालले फिल्मको कथाअनुसार आफ्नो भूमिकाको लागि निकै मेहनत गर्नुपर्ने बताए। त्यस्तै अभिनेत्री हमालले राम्रो टिमसँग काम गर्न पाउँदा खुशी व्यक्त गरिन्।
लुना केसीले निर्माण गर्न लागेको फिल्मको छायांकन भदौ तेस्रो साताबाट सुरू गर्ने बताइएको छ। हरि घले लामाले छायांकन गर्ने फिल्ममा एसोसियट निर्देशक आयुष विसी, मुख्य सहायक निर्देशक शंकर धिताल, प्रोडक्सन मेनेजर नेत्र विस्ट रहेका छन्।
