र्याप गायनमा आधारित रियालिटी शो ‘नेपहपको श्रीपेच’का विजेतालाई नयाँ श्रीपेच मुकुट प्रदान गरिएको छ।
मंगलबार काठमाडौं महानगरपालिकाका मेयर बालेन्द्र शाहले नेपहपका विजेता साइमन विष्ट (भाइबर साइमन) लाई नेपहपको श्रीपेच प्रदान गरेका हुन्। शोका निर्णायक समेत रहेका मेयर शाहले पञ्चधातुबाट बनेको मुकुट पहिराई दिएका थिए।
यसअघि ग्राण्ड फिनालेमा प्रदान गरिएको श्रीपेचप्रति बौद्ध धर्मगुरुहरूले आपत्ति जनाएपछि फिर्ता गरिएको थियो। अहिले विजेतालाई नयाँ श्रीपेच मुकुट प्रदान गरिएको छ।
कार्यक्रममा बोल्दै विजेता साइमनले नेपालको फर्स्ट र्याप रियालिटी शोको विजेता बन्न पाउँदा खुसी व्यक्त गरे।
अहिले प्रदान गरिएको श्रीपेच अन्तर्राष्ट्रिय हिपहपहरूले पनि लगाउने र यसलाई इन्टरनेटमा हेरेर डिजाइन गरिएको आयोजकले बताएका छन्।
