गायक अनिल सिंहले 'रेलिमोई' बोलको देउडा गीत सार्वजनिक गरेका छन्। पप गायनमा चर्चित गायक अनिलले यसपटक देउडा गीत गाएका हुन्।
उनले आफ्नै युट्युब च्यानल 'म्युजिक स्टेट' मार्फत गीत सार्वजनिक गरेका छन्। उनकै संगीत र स्वर रहेको गीतको भिडिओमा उनी स्वयम् फिचर्ड छन्। भिडिओमा उनीसँगै इटालियन मोडल मार्गोस तटेला, निर्मल सिग्देललाई पनि देख्न सकिन्छ।
सुबोध पाण्डेले भिएफएक्स र कलर करेक्सन गरेको भिडिओलाई म्युजिक स्टेटले छायांकन, सम्पादन तथा निर्देशन गरेर तयार गरेको हो। गीतमा रिदमराज जोशीको शब्द रहेको छ।
डेढ दशक अगाडिका चर्चित गायक अनिल सिंह अहिले स्टेज कार्यक्रममा व्यस्त छन्। उनका 'आई लभ यू, प्रेम पत्र, डुब्न देऊ, इन्जिन गाडीमा, प्रेमिका, मैले जानिसके' लगायत दर्जन बढी गीत सुपरहिट छन्।
उनले आफ्नो सफल गीत 'इन्जिन गाडीमा' र 'आइ लभ यु' को दोस्रो भाग पनि छिट्टै दर्शकमाझ ल्याउने बताए। उनी आफ्नो हिट गीतहरू 'द ग्रेट हार्माेनिस्ट २' एल्बममा संग्रहित गर्दैछन्।
'गीत संगीतसँगै अन्य कामहरू पनि छन्। सबै योजनाअनुसार नै अगाडि बढ्ने छु। हामीले एउटा समयमा गरेको कामसँगै अपडेट भएर, ट्रेन्ड बुझेर आउनु पर्छ,' उनले भने। उनी युरोप, दुबई, क्यानडा र अष्ट्रेलियामा कन्सर्टको तयारीमा छन्।
