'महजोडी' मदनकृष्ण श्रेष्ठ र हरिवंश आचार्यको मुख्य भूमिका रहेको फिल्म 'महापुरुष' को फर्स्टलुक पोस्टर सार्वजनिक गर्दै प्रदर्शन मिति तय गरिएको छ। यो फिल्म आगामी कात्तिक ११ गतेदेखि प्रदर्शन हुनेछ।
आइतबार निर्माण टिमले दुई वटा पोस्टर सार्वजनिक गरेका छन्। दुवै पोस्टरमा हरिवंश आचार्यलाई प्रस्तुत गरिएको छ। एक पोस्टरमा भने हरिवंश र गौरी मल्ल बेहुलाबेहुलीको लुकमा भागिरहेको देख्न सकिन्छ।
प्रदीप भट्टराईको लेखन तथा निर्देशन रहेको फिल्ममा हरिवंश, मदनकृष्णसँगै रविन्द्र सिंह बानियाँ, गौरी मल्ल, राजाराम पौडेल, अरुण क्षेत्री, अन्जना बराइली, शिखा तामाङ, कोपिला थाप, शिरु विष्ट, कविता श्रेष्ठ, नरेन्द्र कंसाकार, सविन बास्तोला, नरेश पौडेल, प्रेम पाण्डे, सुमन रिमाल, माधव अधिकारी, प्रकाश भट्टराई, घनश्याम जोशी, अर्जुन आचार्य, प्रज्वल पराजुलीलगायत कलाकारको अभिनय छ।
षट्कोण आट्स प्रस्तुती रहेको फिल्मको निर्माता दिपेश खत्री हुन् भने कार्यकारी निर्माता रविन्द्र सिंह बानियाँ रहेका छन्।
दीपक बज्राचार्यले छायांकन गरेको फिल्मलाई मित्र डि गुरुङले सम्पादन गरेका छन्।
प्रदीप भट्टराईले 'जात्रा, सुत्रगते, जात्रै जात्रा' पछि चौथो फिल्म 'महापुरुष' निर्देशन गरेका हुन्।
