लोक दोहोरी गायिका स्मृति गौतमको नयाँ गीति एल्बम 'अल्लारे माया २' सार्वजनिक भएको छ।
वरिष्ठ गायिका ज्ञानु राणाको प्रमुख आतिथ्यतामा काठमाडौंमा आयोजित एक कार्यक्रमबीच गीत विमोचन गरिएको हो। कार्यक्रममा राणाले मौलिक र मोर्डन दुवैको समिश्रणबाट बनेकोले रचना मन परेको बताउँदै सफलताको शुभकामना दिएकी थिइन्।
यसअघि गायिका गौतम र गायक प्रताप दासको स्वरमा 'अल्लारे माया' बोलको गीत सार्वजनिक भएको थियो। सो गीतको सफलतापछि दर्शक र श्रोताको मायालाई कदर गर्दै आफूले 'अल्लारे माया २' ल्याएको गायिका गौतमले बताइन्। यस गीतको गायनमा गायिका गौतमलाई किरण गौतमले साथ दिएका छन्।
किरण गौतमको शब्द तथा संगीत रहेको गीतमा नारायण दंगालको संगीत संयोजन रहेको छ।
नरेन श्रेष्ठले निर्देशन गरेको म्युजिक भिडिओमा विमल अधिकारी, सञ्जिव ठकुरी, लोमश शर्मा, भुवन चौलागाईं, जोन बम, बद्धिमान लामा, एलिना रायमाझी, आयुष्मा कार्की, सिर्जना किँराती, शशिकला राई, पूजा क्षेत्री, अस्मिता रनपाललाई देख्न सकिन्छ। यो म्युजिक भिडिओलाई विशाल तामाङले कोरियोग्राफी गरेका हुन्।
मुकेश हुमागाईंले छायांकन गरेको भिडिओलाई राजकुमार मगरले सम्पादन गरेका छन्।
गायिका गौतमले 'कालो बजारी’, ‘पानबुट्टे चोली’, ‘टोखा छहरे त्रिशुली बजार’, ‘कामेरो’, अल्लारे माया, सानी मायालु' लगायतका गीतहरूमा स्वर दिएकी छन्।
