सुरेन्द्र पौडेलले निर्देशन गरेको फिल्म 'बाबरी'को नयाँ पोस्टर सार्वजनिक भएको छ।
यसअघि मुख्य कलाकार धिरज मगर र अदिती बुढाथोकीलाई मात्र फिल्मको प्रचार सामाग्रीमा समेटिएको थियो। नयाँ पोस्टरमा डेब्यू अभिनेता धिरज नाडकरलाई समेट्दै पोस्टर सार्वजनिक गरिएको हो। उनी अभिनेत्री तृप्ति नाडकरका छोरा हुन्।
दुई वटा पोस्टरमा धिरज, अदिती र धिरजको मित्रतालाई प्रस्तुत गरिएको छ भने तेस्रो पोस्टरमा धिरज नाडकर र अदितीलाई रोमान्टिक अवतारमा देखाइएको छ।
त्रिकोणात्मक प्रेमकथामा आधारित फिल्ममा धिरज, अदिती र धिरजसँगै बादल भट्ट, कमणमणी नेपाल, उर्मिला बस्नेत, ध्रुव कोइराला, सुनिता श्रेष्ठ, नितेश गुरुङ, त्रिशला तामाङ, दिलिप गुरुङलगायत कलाकारको अभिनय छ।
निर्देशक पौडेलको कथा र सम्पादन रहेको फिल्मलाई नरेन्द्र मैनालीले छायांकन गरेका छन्।
बाबरी फिल्म्सको ब्यानरमा निर्माण भएको फिल्ममा गणेश बुढाथोकी र पुष्पालता बुढाथोकी निर्माता रहेका छन् भने सुष्मा गुरुङले सहनिर्माताको भूमिका निर्वाह गरेकी छन्।
भदौ ३१ देखि प्रदर्शनमा आउने फिल्मको ट्रेलर साउन ३० गते सार्वजनिक गरिने निर्माण पक्षले बताएको छ।
