भदौ ३ गते प्रदर्शन हुने फिल्म 'माइकल अधिकारी'को नयाँ गीत सार्वजनिक भएको छ।
मंगलबार सार्वजनिक गरिएको 'फापरको रोटी' बोलको गीतमा अभिनेत्री सुष्मा कार्की, यशराज गराच, सृष्टि श्रेष्ठ र सौगात मल्ल फिर्चड छन्।
अभिनेत्री सुष्मा कार्की पछिल्लो समय फिल्ममा त्यति सक्रिय छैनन्। लामो समयपछि उनी फिल्म 'माइकल अधिकारी'को गीतमा देखिएकी हुन्।
रवी ओड र टिका प्रसाईंको स्वर रहेको गीतमा दयाराम पाण्डेको शब्द र शम्भुजीत बास्कोटाको संगीत रहेको छ।
फिल्ममा पैसाको प्रलोभनमा परी 'सरोगेसी' अर्थात् कोख भाडा दिएर बच्चा जन्माउने दम्पतीको कथा देखाइएको छ।
गोपीकृष्ण मुभिजको ब्यानरमा निरक पौडेलले निर्माण गरेको फिल्मलाई रन्जित रौनियारले निर्देशन गरेका हुन्। निर्देशक रौनियारको कथा रहेको फिल्ममा पटकथा तथा संवाद शैलेश कँडेलको छ।
फिल्ममा सौगात र सृष्टिसँगै अशान्त शर्मा, लुनिभा तुलाधर, ऐनी कुँवर, हेमन्त बुढाथोकी, विद्या कार्की, जेमिमा टम्स, दिलिप बोहरा, केन्द्र भट्टराई, आर्या पौडेल, केभिन परियारलगायत कलाकारको अभिनय छ।
उद्धव पौडेलको प्रस्तुतीमा निर्माण भएको फिल्मको सम्पूर्ण छायांकन इलाम र झापामा गरिएको छ। यो फिल्मलाई मित्र डि गुरूङले सम्पादन गरेका हुन्।
