टेक पौरखी राईले निर्देशन गरेको फिल्म 'मीलन'को प्रदर्शन मिति तोकिएको छ।
निर्माण टिमले फिल्मको पोस्टर सार्वजनिक गर्दै तिहारपछि अर्थात् कार्तिक १८ गतेदेखि फिल्म प्रदर्शन गर्ने जानकारी दिएको हो।
सार्वजनिक पोस्टरमा अभिनेता कुशल शाह ठकुरी र अभिनेत्री शिल्पा थापालाई प्रस्तुत गरिएको छ। कुशल र शिल्पा यसै फिल्मबाट डेब्यु गर्दैछन्।
त्रिकोणात्मक प्रेम कथामा आधारित फिल्मको कथा निर्देशक राईले नै लेखेका हुन्।
फिल्ममा कुशल र शिल्पासँगै सलोन बस्नेत, शिशिर बांग्देल, सुमिन गुरुङ, जानुका पौडेल, रेजिना एक्चै मगर, डेनियल खड्का, करण थापा मगरलगायत कलाकारको अभिनय छ।
काठमाडौं र कालिन्चोकमा छायांकन गरिएको फिल्मका निर्माता प्रविन थापा हुन्। राहुल राईले छायांकन गरेको फिल्मलाई तारा किम्बे थापाले सम्पादन गरेका छन्।
