मदनकृष्ण श्रेष्ठ र हरिवंश आचार्यको मुख्य भूमिका रहेको फिल्म 'महापुरुष'को पहिलो गीत सार्वजनिक भएको छ।
बाबुको मुख हेर्ने दिनको अवसर पार्दै शनिबार 'बा' बोलको लिरिकल गीत सार्वजनिक गरिएको हो।
नवराज पराजुलीका शब्दले बाबु र छोरालाई भावनात्मक रुपमा जोड्न खोजिएको छ। गीतमा रिदम कँडेलको स्वर तथा संगीत छ।
गीतको भिडिओमा हरिवंशका साथै रविन्द्रसिंह बानियाँ र डेब्यु अभिनेता अरुण क्षेत्रीलाई देख्न सकिन्छ। फिल्ममा हरिवंश र अरुण बाबुछोराको भूमिकामा देखिएका छन्।
सामाजिक विषयवस्तुमा आधारित फिल्मलाई प्रदीप भट्टराईले निर्देशन गरेका हुन्। फिल्ममा कथा लेखन प्रदीपकै हो।
कात्तिक ११ प्रदर्शनमा आउने फिल्ममा मदनकृष्ण, हरिवंश, रविन्द्र र अरुणसँगै गौरी मल्ल, अन्जना बराइली, राजाराम पौडेल, शिखा तामाङ, कोपिला थापा, शिरु विष्ट, कविता श्रेष्ठ, नरेन्द्र कंसाकार, सविन बास्तोला, नरेश पौड्याल, प्रेम पाण्डे, सुमन रिमाल, माधव अधिकारी, प्रकाश भट्टराई, घनश्याम जोशी, अर्जुन आचार्य, प्रज्वल पराजुलीलगायत कलाकारकाे अभिनय छ।
दीपक बज्राचार्यले खिचेको फिल्ममा कालीप्रसाद बाँस्कोटा र रिदम कँडेलको संगीत, शंकर महर्जनको एक्सन र मित्रदेव गुरुङको सम्पादन छ।
षट्कोण आर्ट्सको ब्यानरमा निर्मित फिल्ममा कार्यकारी निर्माता रवीन्द्र सिंह बानियाँ हुन्। म्याक्स दिपेश खत्री फिल्मका निर्माता हुन्।
