दीपेन्द्र के खनाल निर्देशित फिल्म 'के घर के डेरा'को फर्स्टलुक पोस्टर सार्वजनिक भएको छ।
कार्तिक ४ गतेदेखि प्रदर्शन हुने फिल्मको पोस्टरमा दयाहाङ राई, विपिन कार्की, वर्षा राउत, सुरक्षा पन्त र रविन्द्र झा फिचर्ड छन्। सार्वजनिक दुई वटा पोस्टरमा दयाहाङ र विपिन मात्र छन् भने तेस्रोमा कलाकार समूह छन्।
एक पोस्टरमा विपिनलाई चुरोटको बट्टाबाट काजु झिकेर खाँदै गरेको देख्न सकिन्छ। दोस्रो पोस्टरमा टाई-सुट र कालो चस्मामा ठाटिएका दयाहाङलाई देख्न सकिन्छ।
तेस्रो पोस्टरमा वर्षालाई खुशी बनाउन विपिनले लालपुर्जा देखाइरहेको दृश्य छ। पृष्ठभूमिमा दयाहाङ, सुरक्षा र रवीन्द्र छन्। पाेस्टर राेयल भिमसेनले डिजाइन गरेका हुन्।
महेश दवाडीको पटकथा र संवाद रहेको फिल्ममा लक्ष्मी गिरी, आशान्त शर्मा, प्रभाकर न्यौपाने, सरोज अर्याल, भोलाराज सापकोटा, घनश्याम जोशी, कोशिस क्षेत्री, बाल कलाकार आयुशी ढकाललगायत कलाकारको अभिनय छ।
ए प्लस इन्टरटेनमेन्टको व्यानरमा निर्मित फिल्म निर्मातामा शरद श्रेष्ठ, राजीव श्रेष्ठ र किरण महर्जन छन्। सिंगे लामाको कथा रहेको फिल्ममा दीर्घ गुरुङको छायांकन र दीर्घ खड्काको सम्पादन छ।
