अभिनेत्री नम्रता श्रेष्ठ अभिनित 'नारी' बोलको र्याप गीत सार्वजनिक भएको छ।
मंगलबार काठमाडौंमा एक कार्यक्रम आयोजना गर्दै फिल्मको गीत सार्वजनिक गरिएको हो। प्रज्वल श्रेष्ठ र सेडी पोपटको स्वर तथा शब्द रहेको गीतमा प्रज्वल श्रेष्ठको संगीत रहेको छ।
मुनस्टोन प्रोडक्सनले निर्माण गरेको गीतको भिडिओमा नम्रतासँगै आशिष मगर र युनिका केसीको अभिनय देख्न सकिन्छ। महिलामाथि हुने घरेलु हिंसाको कथामा गीतको भिडिओ तयार पारिएको छ। आफूमाथि हुने कुनै पनि प्रकारको हिंसाको प्रतिकार गर्नुपर्छ भन्ने सन्देश गीतले दिन्छ।
गीत सार्वजनिक कार्यक्रममा अभिनेत्री नम्रताले आफूमाथि भएको हिंसा सहेर बस्न नहुने धारणा राखिन्। 'गाउँमा मात्र नभई महिलामाथि हुने घरेलु हिंसा सहरमा पनि उत्तिकै छ। मैले पनि यस्ता खाल्को हिंसा देखेको छु। यस गीतले घरेलु हिंसाविरुद्ध आवाज उठाउन मद्दत गर्नेछ,' उनले भनिन्।
गायक प्रज्वल श्रेष्ठले 'नारी' गीत आफूले आफ्नो आमालाई सम्झिएर लेखेको र गाएको बताए। यो गीतले महिलामाथि हुने घरेलु हिंसा अन्त्य गर्न सघाउने उनको विश्वास छ।
