गत शुक्रबारदेखि प्रदर्शन भइरहेको फिल्म '२ नम्बरी'ले बक्स अफिसमा राम्रो कमाइ गरिरहेको छ।
फिल्मका निर्माता किरण नेपालीले एक साता नपुग्दै आफूहरू नाफामा गइसकेको बताएका छन्।
फिल्मबाट राम्रो मुनाफा कमाउने भएपछि निर्माता किरण नेपालीले फिल्म निर्माणमा पर्दा पछाडि रहेर दुःख गरेका प्राविधिकहरूलाई बोनस दिने भएका छन्।
‘फिल्म निर्माणको समयमा कम पारिश्रमिकमा पनि निकै दुःख गरेर काम गर्नुभएका प्राविधिकहरूलाई हामी बोनस दिन्छौं। फिल्म हिट बनाउनमा उहाँहरूको पनि ठूलो हात छ,’ उनले भने।
प्राविधिकहरूलाई कति मुनाफा दिने भन्ने अहिले पक्का नभएको उनले बताए।
दीपेन्द्र लामाको लेखन तथा निर्देशन रहेकाे फिल्ममा सौगात, दयाहाङ, उपासन र उगेनसँगै बुद्धि तामाङ, पुष्कर गुरुङ, शारदा गिरी, कविता आले, प्रकाश घिमिरे, सुष्मा निरौला, श्रेयांश पौडेल, विश्वास गुरुङ, डिबी गुरुङ, राजु थापामगर, सागर शाह ठकुरी, सतिश सिंह खत्री, गणेश बस्याल, राजकुमार राईलगायत कलाकारको अभिनय छ।
फिल्ममा दुई साथीको मित्रतालाई देखाइएको छ।
दीपक मनाङ्गे, अमलादेवी राई र जयस श्रेष्ठको लगानीमा बनेको फिल्मलाई किरण नेपालीले प्रस्तुत गरेका हुन्।
