रामबाबु गुरुङले निर्देशन गरेको फिल्म 'फूलबारी'को प्रदर्शन मिति घोषणा भएको छ।
निर्माण टिमले आगामी फागुन ५ गतेदेखि फिल्म प्रदर्शन हुने जानकारी दिएका छन्।
यो फिल्मले अभिभावक र सन्तान बीचको सम्बन्धको कथा भन्नेछ। कमल किशोर मलपानीको कथा र कन्सेप्ट रहेको फिल्मको पटकथा उपेन्द्र सुब्बाले लेखेका हुन्।
सामाजिक विषयवस्तुमा बनेको फिल्ममा दयाहाङ राई, विपिन कार्की, प्रियंका कार्की, सिर्जना सुब्बा, अरुणा कार्की, मिरुना मगरलगायत कलाकारको अभिनय छ।
यशोदा फिल्म्स प्रोड्क्सनको ब्यानरमा निर्माण भएकाे फिल्मका निर्माता मनिष ढकाल हुन्। यो फिल्मलाई अमेरिकाका छायांकार जोश हेरुमले छायांकन गरेका छन्।
यो फिल्मसँगै साम्राज्ञी राज्यलक्ष्मी शाह अभिनीत फिल्म ‘लण्डन टु पेरिस’ र प्रकाश सपुत अभिनीत फिल्म ‘परदेशी २’ एकसाथ प्रदर्शन हुने भएको छ। यी दुई फिल्मले यसअघि नै प्रदर्शन मिति तय गरिसकेका थिए।
