प्रेमकथामा निर्माण भएको फिल्म 'मीलन'को प्रदर्शन मिति परिवर्तन भएको छ।
कार्तिक १८ गतेदेखि प्रदर्शन हुने भनिएको फिल्म अब मंसिर ९ गतेबाट प्रदर्शन हुने भएकाे हाे।
फिल्मका निर्देशक तथा लेखक टेक पौरखी राईले एकै मितिमा दुई नेपाली फिल्म प्रदर्शन गर्दा नेपाली फिल्म क्षेत्रलाई नै असर पर्ने र अग्रज फिल्मकर्मीको सल्लाहअनुसार प्रदर्शन मिति सारेको बताए।
केही समयअघि ‘मीलन’को प्रेम र बिछोडले भरिएको ट्रेलर सार्वजनिक गरिएको थियो। यसअघिनै फिल्ममा समावेश ‘तिम्रो इसारा काफी छ बोलको गीत सार्वजनिक गरिएको थियो। जुन गीत लोकप्रिय बन्दै गएको छ।
फिल्ममा अभिनेता सलोन बस्नेत, कुशल शाह ठकुरी र अभिनेत्री शिल्पा थापाको मुख्य भूमिका छ। यसै फिल्मबाट कुशल र शिल्पाले डेब्यु गर्दैछन्।
फिल्ममा सुमिन गुरुङ, शिशिर बांग्देल, विशाल पहाडी, जानुका पौडेल, रेजिना एक्चै मगर, डेनियल खड्का, करन थापा मगरलगायत कलाकारको अभिनय छ। प्रविन थापा फिल्मका निर्माता हुन्।
यो फिल्म काठमाडौं र कालिन्चोकमा छायांकन गरिएको हो।
राहुल राईले छायांकन गरेको फिल्मलाई तारा किम्बे थापाले सम्पादन गरेका हुन्। फिल्ममा समावेश तीन वटा गीतमा कविराज गहतराजको कोरियोग्राफी रहेको छ भने प्रताप दास, कौसल खड्का, कृष्ण केसी, प्रविशा अधिकारी, अस्मिता अधिकारी र बबिना किँरातीको स्वर रहेको छ।
