सरोज खनाल डेब्यु निर्देशित फिल्म ‘बगान’को गीत सार्वजनिक भएको छ।
सोमबार काठमाडौंमा एक कार्यक्रम आयोजना गर्दै फिल्मको 'उडी छुनु छ आकाश' बोलको गीत सार्वजनिक गरिएको हो।
बानिका प्रधानको स्वर रहेको गीतमा सुरेश वाग्लेको शब्द र हरि लम्सालको संगीत छ। गीतको भिडिओमा करिश्मा मानन्धर, सरोज खनाल, मिथिला शर्मा र प्रमिला कार्कीलाई देख्न सकिन्छ।
करिश्मा एकल आमाको भूमिकामा प्रस्तुत छिन् भने प्रमिला छोरीको भूमिकामा देखिएकी छन्। लिरिकल गीतको भिडिओमा एकल महिलाको संवेदनालाई प्रस्तुत गरिएको छ।
सुरेश वाग्लेको निर्माण रहेको फिल्ममा करिश्मा, सरोज, मिथिला, प्रमिलासँगै नीर शाह र बसुन्धरा भुसालको अभिनय छ। फिल्ममा करिश्माका पति विनोद मानन्धर कार्यकारी निर्माता छन्।
नारायण जिसी र उत्सव दाहालले छायांकन गरेको फिल्मलाई सन्देश शाहले सम्पादन गरेका हुन्।
याे फिल्म फागुन १२ गतेदेखि प्रदर्शन हुनेछ।
