सन्तोष पन्तको निर्माण तथा अभिनय रहेको फिल्म 'हिजो आजका कुरा' ले अमेरिकाबाट विदेश प्रदर्शन यात्रा सुरु गरेको छ।
आइतबार अमेरिकाको फेयरफ्याक्स सिटीस्थित सिनेमा आर्ट्स थिएटरमा फिल्म प्रदर्शन भएको थियो।
निर्देशक साकार पन्तका अनुसार १८ देखि २५ नोभेम्बरसम्म अमेरिकाकाे डल्लासस्थित सिनेपोलिस, इयुलेस एण्ड फन मुभी ग्रिलमा फिल्म प्रदर्शन हुनेछ भने २० नोभेम्बरमा ओक्लाहाउमाको रोडियो सिनेमामा प्रदर्शन हुने तय भइसकेको छ।
गत असोज २८ मा देशभरका हलमा प्रदर्शन भएको फिल्मले दर्शकबाट मिश्रित प्रतिक्रिया पाएको थियो। अमेरिकाका अन्य सहरहरूमा पनि फिल्म क्रमशः प्रदर्शन हुने तयारीमा रहेको निर्देशक साकारले जानकारी दिए।
उनका अनुसार अमेरिकासँगै फिल्म २५ नोभेम्बरमा अष्ट्रेलियाको क्यासुअरिनामा प्रिमियर हुँदैछ। त्यसपछि फ्युजन मिडिया प्रोडक्सनले अन्य सहरहरूमा ‘हिजो आजका कुरा’ प्रदर्शन गर्नेछ।
‘विदेशमा हिजो आजका कुराप्रति दर्शकमा देखिएको आकर्षणले अत्यन्तै खुशी लागेको छ। अमेरिका, अष्ट्रेलियासँगै क्यानडा, युरोप, जापानलगायत विश्वका थुप्रै देशबाट फिल्मको डिमाण्ड आएको छ। हामी सकेसम्म धेरैभन्दा धेरै देशमा प्रदर्शन गर्ने तयारीमा छौं,’ निर्देशक साकारले भने।
पन्त फिल्म प्रोडक्सनको ब्यानरबाट निर्माण भएकाे फिल्ममा सन्तोष पन्त, रमा थपलिया, ऋचा शर्मा, केकी अधिकारी, रिमा विश्वकर्मा, दिव्यदेव पन्त, साकार पन्त, जयनन्दन लामा, रमेश अधिकारी, जेविका कार्की, विनायक कुइकेल, अनुष्का अधिकारी, निराजनप्रसाद अर्याल, लक्ष्मी भुषाल, सविन शाक्य, मन्जु श्रेष्ठ, कमला रेग्मीलगायत कलाकारको अभिनय छ।
