गायिका आस्था राउतको नयाँ गीत सार्वजनिक भएको छ।
गायिका राउतकै युट्युब च्यानलबाट ‘कोसिस गर’ बोलको गीत सार्वजनिक गरिएको हो।
साबित्री राउतको शब्द रहेको गीतमा सुरेश अधिकारीले संगीत भरेका छन् भने महाराज थापाको संगीत संयोजन रहेको छ।
गीतले सकारात्मक चिन्तन र सोचलाई प्राथमिकता दिएको छ। दृष्टिविहीनको गीत गाउने चाहना, आत्महत्या गर्न तयार युवकले दृष्टिविहीनको गीत सुनेपछि आत्महत्या नगर्नु, गलत साथीको संगतमा परेका एक विद्यार्थीलाई सम्झाएपछि उसले खेल जित्नु लगायतका दृश्यलाई मार्मिक ढंगले भिडिओमा देखाइएको छ।
भिडिओमा गायिका राउत एक घुमन्ते फोटोग्राफरका रुपमा प्रस्तुत छिन्। जसले खिचेको भिडिओ फुटेज हेरेर दृष्टिविहीन गायिकालाई संगीतकार सुरेश अधिकारीले गीत गाउन स्टुडिओ बोलाएका छन्।
भिडिओमा गायिका आस्थासँगै ‘द भ्वाइस अफ नेपाल’की प्रतिस्पर्धी रिता राई, सरु दाहाल, इश्वर लकाई खड्का र खड्ग गन्धर्व फिचर्ड छन्।
यो म्युजिक भिडिओलाई शान थापाले निर्देशन गरेका हुन्। निर्देशनमा थापालाई राजीव समरले सघाएका छन्।
पवन सुस्लिङले छायांकन गरेको गीतलाई सुप्रिम पराजुलीले सम्पादन गरेका छन्।
