शोभित बस्नेत प्रस्तुतकर्ता रहने फिल्म 'जय हो' लाई टेक पौरखी राईले निर्देशन गर्ने भएका छन्।
सोमबार निर्माण कम्पनी सलोन सलिना फिल्म्स र निर्देशक राईबीच लिखित सम्झौता भएको हो। फिल्ममा यसअघि नै अभिनेता सलोन बस्नेत अनुबन्धित भइसकेका छन्।
सुरेश न्यौपानेको कथा रहेको फिल्ममा अहिलेसम्म सलोन मात्र फाइनल भएका छन्। अन्य कलाकार र मुख्य अभिनेत्रीको छिट्टै टुंगो लाग्ने निर्माण पक्षले बताएको छ।
निर्देशक राई एक कुशल चित्रकार हुन्। उनले कोरेका चित्रहरू विश्वव्यापी रुपमा बिक्री हुने गरेको छ।
माघ अन्तिम सातादेखि छायांकनमा जाने फिल्मलाई काठमाडौं, पोखरा, मुस्ताङ र अस्ट्रेलियामा खिचिनेछ।
एक्सन लभस्टोरी फिल्ममा सागर आले मगरले संगीत भर्नेछन्। सागर ‘नेपाल आइडल- सिजन १’ का तेस्रो रनरअप हुन्।
‘जय हो’मा राज के अधिकारी र सुरज सरकारको लगानी रहनेछ। अधिकारी र सरकार जय हो बिजनेश ग्रुप र सनराइज ग्रुप अष्ट्रेलिया रकडेलका सञ्चालक हुन्।
अभिनेता सलोन र निर्देशक राईले गत महिना रिलिज भएको फिल्म ‘मीलन’ मा सहकार्य गरेका थिए। यो उनीहरूको दोस्रो सहकार्य हो।
