अभिनेता पुष्प खड्का र अभिनेत्री साम्राज्ञी राज्यलक्ष्मी शाहको मुख्य भूमिका रहेको फिल्म 'तिम्रो मेरो साथ' को ट्रेलर सार्वजनिक भएको छ।
मंगलबार काठमाडौंमा एक कार्यक्रम गर्दै फिल्मको ट्रेलर सार्वजनिक गरिएको हो। सार्वजनिक ट्रेलरमा माया, प्रेम र बदलाको कथा देख्न सकिन्छ।
रमेश एमके पौडेल निर्देशित फिल्ममा पुष्प र साम्राज्ञीसँगै सन्दीप क्षेत्री, इमिली लामा, सरोज खनाल, दिपिशा केसी, खड्क बहादुर पुन (खबपु)लगायत कलाकारको अभिनय छ। यो पौडेलको डेब्यु निर्देशकीय फिल्म हो।
‘तिम्रो मेरो साथ’ मा पौडेल स्वयंको कथा, गीत र लगानी छ। फिल्मलाई सबिर श्रेष्ठ तथा बाबुराम निरौलाले मिलेर लेखेका हुन्।
शिव ढकालले छायांकन गरेको फिल्मलाई भूपेन्द्र अधिकारीले सम्पादन गरेका हुन्।
आर्यन फिल्म्स् र बोधी एचडीको ब्यानरमा निर्माण भएको फिल्ममा पासाङ लामा निर्माता हुन् भने निरू भण्डारी, अशोक पोखरेल, सुमन पौडेल तथा सुधिर पराजुली सह-निर्माताका रूपमा छन्। फिल्मको कार्यकारी निर्माता सबिर श्रेष्ठ हुन्।
फिल्म आगामी पुस २९ गतेदेखि प्रदर्शन हुनेछ।
