बलिउड निर्देशक रोहित शेट्टीको फिल्म 'सर्कस' आज शुक्रबारदेखि नेपाली हलमा प्रदर्शनमा आएको छ।
कुनै पनि नेपाली फिल्म प्रदर्शन नभएपछि बलिउड फिल्म 'सर्कस' ले सोलो रिलिजको अवसर पाएको छ।
पिरियड कमेडी ड्रामा फिल्ममा रणवीर सिंह, पूजा हेग्डे, ज्याक्लीन फर्नान्डेज, जोनी लिवर, संजय मिश्र, वरुण शर्मा, सिद्धार्थ जाधव, मुकेश तिवारी, सुलभा आर्या, अश्विनी कल्सेकरलगायत कलाकारको अभिनय छ। फिल्ममा रणवीरले जुम्ल्याहाको भूमिका निवार्ह गरेका छन्।
फिल्ममा रणवीरसँग दीपिका पादुकोणको नृत्य पनि रहेको छ।
यो फिल्मको प्रदर्शन अगावै भारतमा २८ हजार टिकट बिक्री भएको थियो। भारतीय सञ्चार माध्यमका अनुसार फिल्मले रिलिज अगावै करिब १ करोड भारू कमाएको छ।
निर्देशक रोहित र अभिनेता रणवीरले ‘सिम्बा’ मा एकसाथ काम गरेका थिए। यसपछि उनीहरूले ‘सूर्यवंशी’ मा पनि सहकार्य गरेका थिए। यी दुवै फिल्म बक्स अफिसमा सुपरहिट भएको थियो।
नेपाली हलमा अहिले ‘सर्कस’ र हलिउड फिल्म ‘अवतार २’ को वर्चश्व छ। केही हलमा नेपाली फिल्म ‘महापुरूष’ र बलिउड फिल्म ‘दृश्यम २’ लागिरहेको छ।
