चलचित्र विकास बोर्डले स्वदेशी तथा विदेशी फिल्म सेन्सर सिफारिस लिनुपर्ने नियम संशोधन गरेको छ।
सोमबार बसेको बोर्डको बैठकले एक साताअघि नै फिल्म सेन्सर गर्नुपर्ने नियम संशोधन गरेको हो। अब चार दिनअघि दरखास्त पेश गर्नुपर्ने गरी निर्णय गरिएको छ।
यसैगरी, सोही बैठकमा बेलुकी ११ बजेभन्दा पछि फिल्म प्रदर्शन गर्नुपर्दा आवश्यक शान्ति सुरक्षाको व्यवस्था सुनिश्चित हुने गरी प्रदर्शकले फिल्म चलाउन पाउने जानकारी गराइएको छ।
‘पहिला पनि हामीले सुरक्षाका मापदण्ड अपनाउँदै सम्बन्धित निकायलाई जानकारी गराएर ११ बजेपछि फिल्म चलाउन मिल्छ भनेका थियौं। प्रदर्शकहरूले यसलाई बुझ्नु भएनछ, त्यसैलाई हामीले बुझाएर भनेका हौं,’ बोर्डका अध्यक्ष भुवन केसीले सेतोपाटीसँग भने।
यसअघि बेलुका ११ बजेसम्म सकिने गरी फिल्म प्रदर्शन गर्नुपर्ने र त्यसपछि प्रदर्शन गर्नुपरेमा सम्बन्धित जिल्ला प्रशासन कार्यालयको स्वीकृति लिई चलचित्र विकास बोर्डलाई समेत जानकारी गराउनुपर्ने प्रावधान थियो।
