आज शुक्रबार हलमा हरर थ्रिलर फिल्म 'चि मुसी चि: इभन डेड डिजायर बिलङ्गिङ' प्रदर्शनमा आएको छ।
हलमा अन्य फिल्म रिलिज नहुँदा नेपाली फिल्म ‘चि मुसी चि’ ले सोलो रिलिजको अवसर पाएको छ। साथै फिल्मले मल्टिप्लेक्स हलमा उत्साहजनक शो पाएको छ। देशकै ठूलो मल्टिप्लेक्स चेन क्युएफएक्सले फिल्मलाई ३१ शो दिएको छ।
फिल्ममा आफ्नो छोरा जन्मियोस् भनेर कसैको बच्चालाई बली चढाएको कथा देखाइएको छ।
एमी स्टुडिओ प्रोडक्सनको ब्यानरमा निर्माण भएको फिल्ममा प्रियंका कार्की, ऋचा शर्मा, बेनिशा हमाल, आयुष्मान देशराज जोशी, राजन खतिवडा, रविन्द्र झा, गौरव विष्ट, आरपी पोखरेल, अरुण चक्रवर्तीलगायत कलाकारको अभिनय छ।
यो फिल्मलाई मार्ना जेम्स र यश सैनीले संयुक्त रूपमा निर्देशन गरेका हुन्। फिल्ममा अरुण चक्रवर्ती, रिञ्जु केसीको लगानी रहेको छ।
सुशन प्रजापतिले छायांकन गरेका फिल्मलाई यश सैनीले सम्पादन गरेका छन्।
यो फिल्मसँगै हलमा डिसेम्बर फल्स, अवतार २, सर्कस र दृश्यम २ प्रदर्शन भइरहेको छ।
