अभिनेत्री साम्राज्ञी राज्यलक्ष्मी शाह र पुष्प खड्का अभिनीत फिल्म 'तिम्रो मेरो साथ' को चितवनमा प्रिमियर गरिएको छ।
बुधबार आयोजित प्रिमियरमा साम्राज्ञी, पुष्प, अभिनेता सन्दीप क्षेत्रीसहित निर्माण टिम उपस्थित थिए।
यसअघि निर्माण टिमले चिवतनमा महोत्सव पनि आयोजना गरेको थियो। उल्लेख्य दर्शक उपस्थिति रहेको महोत्सवमा निर्देशक रमेश एमके पौडेलसहितको टिमले मनोरञ्जन प्रदान गरेको थियो।
‘तिम्रो मेरो साथ’ टिम सेक्युरिटीका साथ स्टेजमा उतारेको थियो। साम्राज्ञी र पुष्पले नृत्यमार्फत दर्शकलाई मनोरञ्जन दिदा सन्दीपले कमेडीका पन्चलाइनले दर्शक हँसाएका थिए।
महोत्सवपछि लक्की मिडिया हाउसले प्रिमियर आयोजना गरेको हो। सिजी मलस्थित चितवन सिनेप्लेक्समा आयोजित प्रिमियरमा चितवन महानगरकी मेयर रेणु दाहालसहित दर्शकको बाक्लो उपस्थिति थियो।
प्रिमियरपछि लभस्टोरी फिल्मलाई दर्शकले उत्कृष्ट बताएका थिए।
पुस २९ गतेदेखि प्रदर्शन हुने फिल्मका लागि अग्रिम बुकिङ खुला भइसकेको छ। देशको ठूलो मल्टिप्लेक्स हल क्युएफएक्सले १३ शो दिएको छ।
फिल्ममा पुष्प, साम्राज्ञी र सन्दीपसँगै खड्कबहादुर पुन (खबपु), सरोज खनाल, दिपिशा केसीलगायत कलाकारको अभिनय छ। फिल्मको कथा शबिर श्रेष्ठ र बाबुराम निरौलाले तयार पारेका हुन्।
