निर्देशक सौरभ चौधरीको फिल्म 'द अनब्रेकेबल: अगस्त्य' मा अभिनेता सौगात मल्ल अनुबन्धित भएका छन्।
आइतबार एक पोस्टर सार्वजनिक गर्दै फिल्ममा सौगातको अभिनय रहने जानकारी गराइएको हो।
‘मिस्टर भर्सटायल’ को उपाधि दिइएको पोस्टरमा उनी एक कुकुरका साथमा देखिएका छन्। फिल्ममा सौगात अगस्त्यको भूमिकामा देखिनेछन्।
फिल्मका लागि अन्य कलाकारहरू पनि छिट्टै अनुबन्धित गरिने निर्देशक चौधरीले बताए। सौरभ स्वयंको लेखन रहेको फिल्मलाई प्रकाश मल्ल र अनिष तामाङले निर्माण गर्नेछन्।
डार्क हर्स इन्टरटेन्मेन्टको ब्यानरमा निर्माण हुन लागेको यस फिल्मको नेपालमा काठमाडौं र नवलपरासी, भारतमा गोरखपुर र बनारसमा छायांकन हुनेछ। फिल्मलाई राजेश श्रेष्ठले खिच्नेछन्।
दुई श्रृंखलामा निर्माण हुन लागेको फिल्मको दुवै भागको स्क्रिप्ट तयार भइसकेको छ। आगामी वैशाखबाट सुटिङ सुरू गर्ने तयारी गरिएको फिल्म एक्सन प्रधान रहने निर्देशक चौधरीले जानकारी दिए।
