अनमोल केसी स्टारर फिल्म 'जेरी २' मा अभिनेत्री आना शर्मा अनुबन्धित भएकी छन्।
हेमराज बिसीले निर्देशन गर्ने फिल्मको लागि मंगलबार आना र निर्माण पक्षबीच कागजी सम्झौता भएको हो।
फिल्ममा आना अनुबन्धित भएसँगै अनमोलसँग ८ वर्षपछि एकसाथ काम गर्ने पक्का भएको छ। आनाले ८ वर्षअघि फिल्म ‘जेरी’ बाटै डेब्यू गरेकी थिइन्।
‘जेरी २’ मा यसअघि अभिनेत्री पूर्णिका सिजापति अनुबन्धित भएकी छन्। अन्य कलाकारको लागि निर्माण पक्षले दार्जिलिङ, सिक्किम र गान्तोकमा कास्टिङ कल आह्वान गरेको छ।
अनन्या फिल्म्सको ब्यानरमा निर्माण हुने ‘जेरी २’ लाई सरोज न्यौपाने र रामकृष्ण श्रेष्ठले निर्माण गर्नेछन्।
एक महिनापछि छायांकन सुरू हुने फिल्म अस्ट्रेलिया, अमेरिका र सगरमाथा क्षेत्रमा खिचिनेछ।
‘जेरी’ घरेलु बक्स अफिसमा हिट सावित भएको थियो। फिल्ममा अनमोल र आनाको जोडीलाई रूचाइएको थियो। यसै फिल्मको क्रममा अनमोल र आना प्रेम सम्बन्धमा रहेको चर्चा थियो। तर उनीहरूले प्रेम सम्बन्धबारे खुलेर कुरा गरेका थिएनन्।
