गायिका तृष्णा गुरुङले ठमेलस्थित टर्टल लाउन्ज एन्ड क्लबमा लाइभ कन्सर्ट गर्ने भएकी छन्।
उनले शुक्रबार राति ९ बजेबाट आफ्नो ब्यान्डसहित लाइभ प्रस्तुति दिने क्लबका सञ्चालक आयुष ठकुरीले जानकारी दिए।
नेपाली संगीतकर्मीका रूपमा बेलायतको रोयल अल्बर्ट हलमा प्रस्तुति दिइसकेकी गुरुङका गीत युवा पुस्तामाझ चर्चित छन्।
टर्टलमा आज उनले माया पिरती, खानी हो यामी, गाइने दाजैले, साँझको बेला, तिम्रो मेरो प्रेम, गुराँसै फुल्योसहित दर्जन बढी आफ्ना चर्चित गीत प्रस्तुत गर्नेछिन्।
गायिका गुरुङ भ्वाइस अफ नेपाल तेस्रो सिजनकी कोचसमेत हुन्।
विगत पाँच वर्षदेखि सञ्चालित टर्टल क्लब गत क्रिसमस इभमा सविन राईको लाइभ कन्सर्टसहित नयाँ स्वरुपबाट सञ्चालनमा छ।
केही सातासम्म अब हरेक शुक्रबार टर्टलमा चर्चित कलाकारहरूको लाइभ प्रस्तुति तय भएको सञ्चालक ठकुरीले बताए।
