अभिनेता नाजिर हुसेनको मुख्य अभिनय रहेको फिल्म 'गुलाबी' को पहिलो पोस्टर सार्वजनिक भएको छ।
महिला निर्देशक समुन्द्र भट्टको निर्देशनमा तयार फिल्ममा अभिनेता नाजिर हुसेन पारलैंगिक महिला (ट्रान्सवुमन)को भूमिकामा देखिएका छन्। सार्वजनिक पोस्टरमा नाजिरलाई गाजल, टीका र नथियामा गम्भीर मुद्रामा देख्न सकिन्छ।
यस फिल्मका लागि अभिनेता नाजिरले १६ केजी तौलसमेत घटाएका छन्। फिल्ममा उनी गुलाबी पात्रको भूमिकामा देखिनेछन्।
फिल्ममा नाजिरसँगै सञ्चिता लुइँटेल, सुशिल सिटौला, राजकुमार घोष, शिशिर राणा, अनुपम श्रेष्ठ, विशाल पहारीलगायत कलाकारको अभिनय छ। फिल्मको पटकथा तथा संवाद रामकुमार श्रेष्ठ र नाजिर हुसेनले तयार पारेका हुन्।
दि स्काइ ओसन इन्टरटेन्मेन्टको ब्यानर र अनुपम फिल्म्ससँगको सहकार्यमा निर्माण हुने 'गुलाबी'लाई आलोक शुक्लाले छायांकन गर्दैछन्। भद्र भुजेल एसोसिएट निर्देशक रहने फिल्ममा पुष्कर लामाको निर्माण नियन्त्रण रहनेछ भने निर्माण व्यवस्थापकमा यम ओली छन्।
क्यानडाको टोरन्टो फिल्म स्कुलबाट निर्देशन कक्षा लिएर नेपाल फर्केकी निर्देशक भट्टले 'आधा पेज' नामक फिल्म निर्देशन गरिसकेकी छन्।
