दयाहाङ राई र प्रकृति श्रेष्ठ अभिनीत फिल्म 'बिहे पास' को प्रदर्शन मिति घोषणा गरिएको छ। यो फिल्म नयाँ वर्षको अवसर पारेर वैशाख १ गतेदेखि प्रदर्शन हुन लागेको हो।
‘बिहे पास’ को प्रदर्शन मिति घोषणा भएसँगै वैशाख १ गते दयाहाङको दुइटा फिल्म एकसाथ प्रदर्शन हुने भएका छन्। केही समयअघि सोही मितिमा दयाहाङ र मिरुना मगर अभिनीत फिल्म ‘जारी’ प्रदर्शन घोषणा गरिएको थियो।
वैशाख १ गते भगवत् गीता, नाई नभन्नु ल ६ र प्रसाद २ पनि प्रदर्शन हुने बताइएको छ।
प्रवेश पौडेलले निर्देशन गरेको फिल्म ‘बिहे पास’ मा दयाहाङ र प्रकृतिसँगै रविन्द्र झा, बुद्धि तामाङ, शिशिर वाङ्देल, श्याम राई, विशाल पहारी, सुवास गजुरेल, हिउँवाल गौतमलगायत कलाकारको अभिनय छ।
रोहित कट्टेलको प्रस्तुतिमा तयार भएको फिल्ममा रत्न श्रेष्ठ कार्यकारी निर्माता र रोजन श्रेष्ठ निर्माताको रुपमा छन्।
