अभिनेता जितु नेपाल र साम्राज्ञी राज्यलक्ष्मी शाह अभिनीत फिल्म 'ह्यारीकी प्यारी' को नयाँ गीत सार्वजनिक भएको छ।
शनिबार ओएसआर डिजिटल युट्युब च्यानलमार्फत ‘दम दम’ बोलको गीत सार्वजनिक गरिएको हो। थोम्स एन्ड्रियुजको स्वर रहेको गीतमा युग भुषालको शब्द तथा संगीत छ।
कविराज गहतराजले कोरियोग्राफी गरेको गीतमा साम्राज्ञी राज्यलक्ष्मी शाह र आरए सुरज पौडेलको नृत्य छ।
कमेडी जनराको फिल्मलाई चिकित्सक भोला रिजालका छोरा कपिल रिजालले निर्देशन गरेका हुन्। दन्त चिकित्सक कपिल रिजाल यही फिल्मबाट निर्देशनमा डेब्यू गर्दैछन्। फिल्ममा सम्झौताको विवाहले ल्याउने उतारचढावलाई देखाइएको छ।
बिआर प्रोडक्सनकको प्रस्तुतीमा निर्माण भएको फिल्ममा जितु र साम्राज्ञीसँगै विजय बराल, लक्ष्मी गिरी, सुवास गजुरेल, नरेश पौडेल, रञ्जना भट्टराई, समिक्षा पौडेल, डिल्लीराम खनाल, रमेश अधिकारीलगायतको अभिनय छ।
फिल्मको कथा निर्देशक रिजाल स्वयंले तयार पारेका हुन् भने पटकथा र संवाद उनीसँगै सुदीप बराल, गिरीराज घिमिरे, अभिमन्यू निरवीले मिलेर लेखेका हुन्। सुदीप बरालले छायांकन गरेको फिल्मलाई अर्जुन जिसीले सम्पादन गरेका छन्।
यो फिल्म माघ २० गतेदेखि प्रदर्शन हुँदैछ।
