रेडियोकर्मी भूपेन्द्र खड्काले बलिउड अभिनेत्री मनिषा कोइरालासँग कुराकानी गर्दै भिडियो पोडकास्टको शुरुवात गरेका छन्।
‘भुपेन्द्र खड्का पोडकास्ट’ नामक युट्युब च्यानलबाट शुरु सो पोडकास्टमा हाम्रो समाजका विभिन्न क्षेत्रका लब्धप्रतिष्ठित व्यक्त्तित्वहरूसँग 'हृदय-संवाद' गर्ने खड्काले बताए।
केही समयमा आफ्नो पोडकास्ट संसारभरका महत्त्वपूर्ण अडियो माध्यमबाट सुन्न सकिने पनि उनले बताएका छन् ।
२ दशकभन्दा लामो समयदेखि सञ्चारका विभिन्न माध्यम विशेष गरी रेडियोमा सफल प्रस्तोताको छवि बनाएका खड्का नेपालका सफल गीत तथा गजलकारको रूपमा चिनिन्छन्। ५० वटा नेपाली सिनेमासहित ४५० भन्दा बढी गीत रेकर्ड भएका उनका दर्जनौं हिट गीतहरू छन् ।
बदलिँदो समयअनुसार सजिलो माध्यममा स्रोता र दर्शकले सुन्न र हेर्न सकून् भन्ने उद्देश्यले आफूले पोडकास्टको शुरुवात गरेको उनले बताए।
उनी भन्छन्, ‘अहिलेको समय अडियोमा कन्टेन्ट र भिडियोमा क्वालिटी खोज्ने जमातको हो । मैले मेरो शैलीमा गरेको कुराकानीले हेर्ने र सुन्नेको जीवनशैली बदल्न कतै न कतै भूमिका निर्वाह गर्नेछ।’
हाल हप्ताको एक एपिसोडको रूपमा रिलिज भएको सो पोडकास्ट समयानुसार परिवर्तन हुने उनले बताए।
‘परिवर्तित समय अनुसार पोडकास्ट स्रोता र दर्शकसम्म आफ्ना कुरा राख्ने बलियो माध्यम हो। त्यसैले मैले नेपालमा पहिलोपटक पोडकास्टमा कुराकानी गरें,’, मनिषा कोइरालाले भनिन्।
हाल मनिषा सन्जयलीला भन्सालीको वेभ सिरिजको सुटिङका लागि मुम्बईमा छिन्!
