दयाहाङ राई र प्रकृति श्रेष्ठ अभिनीत फिल्म 'बिहे पास' को पोस्टर सार्वजनिक भएको छ।
शनिबार निर्माण टिमले फिल्मको तीन वटा पोस्टर सार्वजनिक गरेका हुन्। एक पोस्टरमा दया र प्रकृतिलाई प्रस्तुत गरिएको छ भने दोस्रो पोस्टरमा दया र प्रकृतिसँगै रूषा न्यौपानेलाई देख्न सकिन्छ।
तेस्रो पोस्टरमा दया, प्रकृति, बुद्धि तामाङ, शिशिर वाङ्देल, रविन्द्र झालाई प्रस्तुत गरिएको छ। निर्माण टिमले प्रदर्शन मितिलाई 'जन्त जाने दिन' भन्ने नारा दिएको छ।
यो फिल्म नयाँ वर्षको अवसर पारेर वैशाख १ गतेदेखि प्रदर्शन हुन लागेको हो। वैशाख १ गते दयाहाङको दुइटा फिल्म एकसाथ प्रदर्शन हुनेछ।
यही मितिमा दयाहाङ र मिरुना मगर अभिनीत फिल्म 'जारी' प्रदर्शन हुनेछ।
प्रवेश पौडेलले निर्देशन गरेको फिल्म ‘बिहे पास’ मा दयाहाङ र प्रकृतिसँगै रविन्द्र झा, बुद्धि तामाङ, शिशिर वाङ्देल, रूषा न्यौपाने, श्याम राई, विशाल पहारी, सुवास गजुरेल, हिउँवाल गौतमलगायत कलाकारको अभिनय छ।
रोहित कट्टेलको प्रस्तुतिमा तयार भएको फिल्ममा रत्न श्रेष्ठ कार्यकारी निर्माता र रोजन श्रेष्ठ निर्माताको रुपमा छन्।
