अभिनेत्री वर्षा शिवाकोटी र रमेश बानियाँ अभिनीत फिल्म 'ए साथी सुन' को शीर्ष गीत सार्वजनिक भएको छ।
आइतबार साईराम पिक्चर्स युट्युब च्यानलबाट फिल्मको शीर्ष गीत सार्वजनिक गरिएको हो। अञ्जु पन्त र किरण भुजेलको स्वर रहेको गीतमा वर्षा र रमेशलाई रोमान्टिक अवतारमा देख्न सकिन्छ।
रविना मगरको शब्द रहेको गीतमा सुरज अधिकारीले संगीत भरेका छन्। रामजी लामिछानेले कोरियोग्राफी गरेको गीतको भिडिओ पोखराका रमणीय स्थानमा खिचिएको हो।
लभस्टोरी, थ्रिलर र कमेडी जनराको फिल्ममा वर्षा र रमेशसँगै सुशिल पोखरेल, जयनन्द लामा, रमेश अधिकारी, बिमला गिरी, सुवाष शाहीलगायत कलाकारको अभिनय छ। रमेश बानियाँ यही फिल्मबाट डेब्यू गर्दैछन्।
राम राघव आचार्यको लेखन तथा निर्देशन रहेको फिल्मलाई बिना कार्की र सन्तोषकुमार राईले मिलेर निर्माण गरेका हुन्।
इभान इन्टरटेनमेन्टको प्रस्तुतिमा निर्माण भएको फिल्मको सह-निर्मातामा सुदीप पौडेल छन्। फिल्मलाई आरआर फिल्म्सले वितरण गर्न लागेको हो।
यो फिल्म चैत १० गतेदेखि प्रदर्शन हुनेछ।
