सुरज पाण्डेको डेब्यु निर्देशित फिल्म 'परस्त्री' को नयाँ प्रदर्शन मिति घाेषणा भएको छ।
यो फिल्म आगामी असार १५ गतेदेखि प्रदर्शन हुनेछ। यसअघि फागुन १९ गतेदेखि फिल्म प्रदर्शन हुने भनिएको थियो।
प्राविधिक कार्य सम्पन्न नभएकाले फिल्मको प्रदर्शन मिति परिवर्तन गरिएको निर्माण टिमले जानकारी दिए।
फिल्ममा कोसिस क्षेत्री, शिल्पा मास्के, गौरव विष्ट, अलिसा क्षेत्री, आशान्त शर्मालगायत कलाकारको अभिनय छ।
विवाहेत्तर सम्बन्धले निम्त्याउने पारिवारिक र सामाजिक संकटको कथावस्तुमा निर्माण भएको फिल्म काठमाडौं र मुस्ताङमा छायांकन गरिएको हो। निरज पाण्डेले फिल्मको छायांकन गरेका हुन्।
डिएस डिजिटलको ब्यानरमा निर्माण भएको फिल्मका निर्माता दिपेन्द्र के खनाल र शर्मिला पाण्डे छन्। खनाल फिल्मका लेखकसमेत हुन्।
