विकाशराज आर्चाय निर्देशित फिल्म 'नाईं न भन्नू ल ६' को टिजर सार्वजनिक भएको छ।
बिहीबार ओएसआर डिजिटल युट्युब च्यानलमार्फत फिल्मको टिजर सार्वजनिक गरिएको हो। सार्वजनिक टिजरमा नव-अभिनेता आशिर्वाद क्षेत्रीको एक्सन देख्न सकिन्छ।
अभिनेत्री आँचल शर्मा, केकी अधिकारी, प्रियंका कार्की र सरोज खनाल र अथर्व उप्रेती पनि टिजरमा अटाएका छन्। फिल्ममा आशिर्वाद र आँचललाई जोडीको रूपमा प्रस्तुत गरिएको छ।
अभिनेता निखिल उप्रेती र अभिनेत्री संचिता लुइँटेलका छोरा अथर्व यसै फिल्मबाट अभिनयमा डेब्यू गर्दैछन्। फिल्मको कथा निर्देशक आचार्यसँगै सामिप्य तिमल्सेना, अरूणदेव जोशीले तयार पारेका हुन्।
निर्माणमा निर्देशक आचार्यले विष्णुमणि दाहालसँग सहकार्य गरेका छन् भने कार्यकारी निर्मातामा सञ्जय न्यौपाने, रमेश चौधरी र पुरुषोत्तम प्रधान छन्।
पुरुषोत्तम प्रधानले छायांकन गरेको फिल्मलाई सन्देश शाहले सम्पादन गरेका छन्।
यो फिल्म आगामी वैशाख १ गतेदेखि प्रदर्शन हुनेछ। यस फिल्मका अघिल्ला सिरिज बक्स अफिसमा सफल भएका थिए।
