सनम कुमार बैराग निर्देशित फिल्म 'कैदीको पत्र' को पहिलो गीत सार्वजनिक भएको छ।
प्रदर्शन मिति तोक्दै फिल्ममा समावेशी 'मेरो दिलको तालमा' बोलको गीत सार्वजनिक गरिएको हो। यो फिल्म वैशाख १५ गतेदेखि प्रदर्शन हुनेछ।
प्रताप दास र सुबानी मोक्तानको स्वर रहेको गीतमा सनम कुमार बैरागको शब्द र सुरेश सेञ्चुरीको संगीत छ। यस गीतको अंग्रेजी लाइन निखिल गोतामेले लेखेका छन्।
कविराज गहतराजले कोरियोग्राफी गरेको गीतको भिडिओमा कुनाल विश्व र ब्रिटिश अभिनेत्री म्याडिशन लाजारसलाई देख्न सकिन्छ।
फिल्ममा आफ्नो जीवनमा पाएको खुशीलाई सम्हाल्न नसक्दा मानिसले व्यहोर्नुपर्ने उतारचढावलाई देखाइएको निर्देशक सनमले बताए।
यो फिल्मको सम्पूर्ण छायांकन स्कटल्याण्डमा गरिएको हो। फिल्ममा कुनाल र म्याडिशनसँगै सलिना थापामगर, पृथ्वीराज खत्री, सुवर्ण थापा, मनिष श्रेष्ठलगायत कलाकारको अभिनय छ। दिल घले, नानी बैराग, कैलाश विश्वकर्मा र हिराल जोशी फिल्मका निर्माता हुन्।
रामेश्वर कार्कीले छायांकन गरेको फिल्मलाई अर्जुन जिसीले सम्पादन गरेका छन्।
